Jeshi la Polisi mkoani Mtwara linamshikilia Kristatus Victory (23) mkazi wa Lukuledi wilayani Masasi kwa tuhuma za kumuua baba yake mzazi, Victory Milanzi (74) kwa madai ya kushindwa kumtafutia mchumba wa kuoa.

Akizungumza Kaimu Kamanda wa Polisi mkoani humo, ACP Issack Mushi amethibitisha kutokea kwa tukio hilo ambapo amesema mtuhumiwa anadaiwa kumchoma kisu mdomoni na tumboni baba yake, kisha kumjeruhi mama yake mzazi, Carolina Ludugeli (68).

Ameongeza kuwa mtuhumiwa anashikiliwa kwaajili ya mahojiano na baada ya upelelezi kukamilika atafikishwa mahakamani ili kujibu tuhuma zinazomkabili.

Naye mama mzazi wa mtuhumiwa ameeleza kuwa alisikia sauti ya mume wake akipiga mayowe yasiyo ya kawaida, na alipoingia ndani ya chumba alimkuta mtoto wake akiwa amemuwekea kisu mdomoni baba yake ambaye alikuwa akivuja damu.

Ameongeza kuwa alipojaribu kumsogelea mtoto wake, alimpiga kwa kutumia kisu na panga, ndipo alipolazimika kuomba msaada kwa majirani kumsaidia mume wake ambaye tayari alikuwa ameshapoteza maisha.

Chanzo: Nipashe