Polisi wameanzisha uchunguzi kuhusu kifo cha mwanaume mwenye umri wa miaka 37 aliyeuawa huko North East Kadem, Wilaya ya Nyatike nchini Kenya kutokana na kumgombania mke wa mtu.

Kulingana na Mkuu wa Eneo, Voshastar Akal uchunguzi wa awali ulibaini kwamba marehemu Kevin Ouma alikuwa amejiandaa kukutana na mwanamke huyo nyumbani kwa mwanamke huyo usiku huo.

Masaa machache baada ya Ouma kufika, mshukiwa wa mauaji Johnson Ochieng alifika nyumbani kwa mwanamke huyo, na ndipo mgogoro ulipozuka na kuanza kupigana kwa silaha za jadi, ambapo Ouma alipata majeraha makubwa kifuani na kufariki kutokana na majeraha aliyopata. Mshukiwa pia alijeruhiwa vibaya na kwa sasa anapatiwa matibabu katika Hospitali ya Mkoa ya Migori.

Chifu wa eneo hilo, Voshastar Akal amesema baada ya tukio hilo, familia ya marehemu ilivamia nyumba ya mwanamke huyo na kuteketeza nyumba yake.

Mwanamke huyo, ambaye ni mke wa mtu, amesema mume wake anafanya kazi nje ya Wilaya ya Migori.

Polisi wanaendelea na uchunguzi wa tukio hilo, huku uchunguzi wa kina ukitarajiwa kutoa majibu kuhusu chanzo cha mgogoro huo na hatua zinazofuata.