Benki ya Exim Tanzania imeandaa futari maalum jijini Dar es Salaam, ikikusanya pamoja Wateja wake, viongozi wa dini, na wadau wakuu kwa jioni ya shukrani, mshikamano, na tafakari katika mwezi huu mtukufu wa Ramadhan.
Hafla hiyo ilihudhuriwa na Sheikh Mkuu na Mufti wa Tanzania, Sheikh Dkt. Abubakar Zubeir Bin Ally, ambapo ilitoa fursa ya kusherehekea maadili ya ukarimu, uadilifu, na msaada wa kijamii—ambayo yanawiana na misingi ya Uislamu pamoja na dhamira ya Benki ya Exim ya kuwawezesha watu kifedha na kuwajibika kwa jamii.
Akizungumza katika hafla hiyo, Ofisa Mtendaji Mkuu wa Benki ya Exim, Jaffari Matundu, alisisitiza kujitolea kwa benki hiyo katika kuhudumia wateja wake kwa uadilifu na ujumuishi.
“Futari hii siyo tu tukio la kufuturu pamoja, bali ni uthibitisho wa maadili tunayoshikilia kwa pamoja na dhamira yetu ya kutoa suluhisho za kifedha zinazoheshimu na kuzingatia misingi ya maadili ya kibenki. Benki ya Exim itaendelea kujikita katika kuwawezesha watu kiuchumi na kuimarisha ushirikiano unaochochea maendeleo chanya,” alisema Matundu.
Jaffari aliongeza kuwa, “Tunafahamu kuwa uchumi imara unajengwa juu ya msingi wa uaminifu, uvumbuzi, na ushirikiano. Ndiyo maana tuko hapa—si kama benki pekee, bali kama mshirika wa safari ya kuelekea ustawi wa kiuchumi.”
Kwa upande wake, Sheikh Dkt. Abubakar Zubeir Bin Ally aliipongeza Benki ya Exim kwa jitihada zake za kushirikiana na jamii na kusaidia ujumuishi wa kifedha.
“Benki ya Exim mnafanya kazi nzuri ya kuwahudumia wateja wenu kwa huduma bora, hili ni jambo kubwa na muhimu inayojenga imani, maadili na upendo kutoka kwa wateja, hivyo endeleeni na ukarimu huu. Pia muendelee kutoa elimu kuhusu huduma mnazotoa, masuala ya kifedha, na kutoa ushauri kwa wateja wenu,” alisema Sheikh Dkt. Abubakar.
Hafla ya futari hii ni sehemu ya dhamira pana ya Benki ya Exim ya kushirikiana na wateja wake na kusaidia jamii kupitia miradi mbalimbali ya kijamii. Mbali na kutoa huduma za kifedha zinazozingatia misingi ya sheria, benki hiyo inaendelea kuwekeza katika programu zinazolenga kuinua biashara na watu binafsi huku ikikuza maadili ya kibenki yenye uwazi na uadilifu.
Benki ya Exim inaendelea kuwa mshirika wa kuaminika wa kifedha, ikihakikisha kuwa huduma zake si tu zinakidhi mahitaji ya wateja wake, bali pia zinachangia ustawi wa jamii kwa ujumla.
