Kufariki usingizini mara nyingi huhusishwa na mshtuko wa ghafla wa moyo na moyo kupoteza utendaji wake unaohusishwa na kushindwa kwa moyo (CHF).
Hapa tunachunguza sababu mbalimbali zinazowafanya watu kufariki wakiwa wamelala, ikiwa ni pamoja na mambo yanayoongeza uwezekano wa kufariki kutokana na kushindwa kwa moyo wakiwa usingizini.
1.Mshtuko wa Moyo
Mshtuko wa moyo ni wakati moyo unapoacha kupiga ghafla. Bila matibabu ya haraka ya kitabibu, kifo cha ghafla kinaweza kutokea ndani ya dakika chache. Hatari ya kifo ni kubwa wakati wa usingizi kwa sababu huduma ya dharura ya matibabu kawaida huchelewa.
Kati ya sababu zote zinazowezekana za kifo cha usiku (kifo wakati wa kulala), mshtuko wa ghafla wa moyo ni miongoni mwa zinazotokea mara nyingi zaidi. Kati ya hizo, takriban asilimia 22 hutokea kati ya saa 4:00 usiku na 12:00 asubuhi, kulingana na utafiti wa 2021 katika jarida la Heart Rhythms.
2. Kiharusi
Moyo unaweza kuathiri mifumo mingine inayotegemea uwezo wake wa kusambaza damu. Hasa, rhythm isiyo ya kawaida ya moyo inaweza kusababisha kuganda kwa damu kunakoenda kwenye ubongo na kusababisha kiharusi. Shinikizo la damu la juu linaweza kuongeza hatari hii.
Ikiwa kiharusi kitaathiri shina la ubongo, kupumua, kufungua macho, kudhibiti misuli, na fahamu vinaweza kuathirika. Kiharusi hiki kinaweza kuwa hatari na kinaweza kutokea wakati wa usingizi.
3. Kukoma kwa kupumua
Katika kiwango cha msingi kabisa, mapafu yanawajibika kwa kubadilishana oksijeni na kaboni dioksidi na mazingira. Wakati hayafanyi kazi ipasavyo, viwango vya oksijeni hushuka, viwango vya kaboni dioksidi huongezeka, na mabadiliko hatari ya usawa wa asidi na besi mwilini yanaweza kutokea.
Wakati usawa huu unakuwa hatari vya kutosha, kukoma kwa kupumua kunaweza kutokea. Hii pia inaweza kuweka shinikizo kubwa kwenye moyo na kusababisha kushindwa kufanya kazi.
4. Aina ya 1 ya kisukari
Ugonjwa wa Kisukari unaweza kuwa chanzo cha magonjwa mengine, kama vile magonjwa ya moyo, ambayo yanakuweka katika hatari ya kifo cha usiku. Unaweza kusababisha mabadiliko ya sukari kwenye damu ambayo yanaweza kusababisha kifo kisichotarajiwa.
Hata wanapokuwa waangalifu kuhusu kudhibiti viwango vya sukari wakati wa mchana, watu wenye kisukari ya aina ya 1 wanaweza kukabiliana na matatizo wakati wa usiku, viwango vyao vinaweza kushuka na kusababisha degedege au kifo.
5. Sumu ya Monoksidi ya kaboni
Sumu ya monoxide ya carboni kutokana na uingizaji hewa chafu inaweza kusababisha kifo kwa kukosa hewa. Kuathiriwa na viwango vya juu vya monoxide ya carboni kunaweza kusababisha dalili mbaya ambazo ni pamoja na kizunguzungu, kupumua kwa shida (dyspnea), kichefuchefu, na mapigo ya moyo yasiyo ya kawaida.
Ikiwa umelala, hautasikia athari hizi, lakini wakati monoxide ya carboni inaingia kwenye damu, inazuia oksijeni ya kutosha kuzunguka kupitia viungo vya mwili. Hii inasababisha kushindwa kwa moyo na kukoma kupumua, na hivyo kufanya monoxide ya carboni kuwa hatari ndani ya dakika chache.
6. Dawa za kulevya
Dawa fulani zinazotumika kutibu maumivu na usingizi zinaweza kuongeza hatari ya kifo kwa kukandamiza sehemu za ubongo zinazodhibiti kupumua. Hii ni kawaida wakati dawa inatumika kupita kiasi au kuchanganywa na vilainishi vingine, ikiwa ni pamoja na pombe.
7. Kukabwa
Inawezekana pia kukabwa hadi kufa wakati wa kulala. Hii inaweza kutokea ikiwa mtu atatapika wakati wa degedege la usiku au baada ya kunywa pombe kupita kiasi. Inaweza pia kutokea ikiwa utalala na chakula au kipande cha dawa mdomoni na kuvuta kwa bahati mbaya.
8. Kifafa
Kuna hali inayojulikana kama kifo cha ghafla katika kifafa (SUDEP) ambacho hakieleweki kikamilifu. Hata hivyo, huathiri mtu 1 kati ya 1,000 mwenye kifafa kila mwaka na ndiyo chanzo kikuu cha vifo vya watu wenye kifafa kisichodhibitiwa.
