Katika utafiti uliofanywa hivi karibuni nchini Italia, ambao umeonyesha kiwango cha juu cha ubaguzi unaowakabili Waafrika wanaoishi nchini humo, imekuwa dhahiri kuwa kuna haja kubwa ya kuchukua hatua za dhati kuelekea kujenga jamii yenye haki na usawa.

Uchunguzi uliofanywa Oktoba 2023 kwa sampuli ya watu 800, umeonyesha taswira halisi ya changamoto ambazo jamii za Kiafrika zinakabiliana nazo katika kujumuika katika jamii ya Kiitaliano.

Moja ya matokeo muhimu ya utafiti huo ni kwamba asilimia kubwa ya watu wa Italia wanatambua kwamba Waafrika wanaoishi nchini mwao mara nyingi wanakumbana na ubaguzi na kutengwa. Sababu za ubaguzi huu zimegundulika kuwa ni pamoja na changamoto za kuchangamana katika jamii ya Kiitaliano na kwamba Waafrika wengi wanaoishi nchini humo hawaishi kwa amani na wazawa.

Baadhi ya washiriki wa uchunguzi huo wameeleza kwamba kampuni za Italia mara nyingi huwachukulia wahamiaji wa Kiafrika kama ni watu wanaoweza kufanya kazi kwa gharama ya chini sana kuliko wafanyakazi wengine.

Kadhalika, washiriki wa uchunguzi huo walibainisha kwamba kukosekana kwa nia ya kukubali tamaduni na mila za Kiafrika na Wataliano ni moja ya vikwazo vikuu. Hii inaonyesha umuhimu wa mazungumzo ya kina na mabadilishano ya kitamaduni ili kukuza uelewa na heshima kati ya tamaduni tofauti.

Hata hivyo, matumaini yanaweza kupatikana kupitia kauli ya Roberta Rughetti, Naibu Mkurugenzi wa Amref-Italia, ambaye amesisitiza umuhimu wa kufanya kazi pamoja ili kuondoa vikwazo vinavyosababisha watu wenye asili ya Kiafrika kubaguliwa na kutengwa.