Tanzania imepanga kujenga kiwanda cha kutengeneza kompyuta mpakato, hatua inayotarajiwa kuleta mapinduzi katika sekta ya teknolojia ya habari na mawasiliano (TEHAMA) nchini.

Kiwanda hicho kitazalisha kompyuta mpakato za Tanzanite, zikiwa zinalenga hasa kuunga mkono elimu ya TEHAMA kuanzia shule za msingi hadi sekondari, jambo linaloashiria hatua kubwa kwa mchakato wa viwanda na mabadiliko ya kidigitali.

Mradi huo unaosimamiwa na Tume ya TEHAMA ya Tanzania, umepiga hatua baada ya mazungumzo na kampuni ya India, QuadGen Wireless Solutions Pvt. Ltd, inayojulikana kwa uzalishaji wa vifaa vya TEHAMA.

Mkurugenzi Mkuu wa Tume ya TEHAMA, Dkt. Nkundwe Mwasaga ameelezea athari chanya za mradi huo wakati wa uwasilishaji bungeni jijini Dodoma, Januari 24, 2025.

“Kiwanda hiki si kwa ajili ya kuzalisha kompyuta mpakato tu, bali ni kwa ajili ya kuwawezesha kizazi kijacho kuwa na nyenzo muhimu za kufanikisha maisha katika uchumi wa kidigitali,” amesema.

Kwa sasa, nchi kama China, Marekani, na Korea Kusini ndizo zinazoongoza kwa uzalishaji wa kompyuta mpakato duniani, huku Tanzania ikiagiza maelfu ya kompyuta kila mwaka ili kukidhi mahitaji yanayoongezeka.

Chanzo: The Citizen