Kila mtu anapenda kuonekana akiwa na ngozi nzuri yenye kupendeza. Hata hivyo, baadhi ya watu hawafahamu kuwa baadhi ya mazoea yanaweza kuwa chanzo cha ngozi kuzeeka mapema na kupoteza mvuto.
Ikiwa unapenda kutumia baadhi ya vinywaji hivi vifuatavyo, vinaweza kuchangia kwa kiasi kikubwa kuzeeka kwa ngozi yako kutokana na athari zake kiafya;
Pombe: Unywaji wa pombe kwa kiasi kikubwa unaweza kuharibu ngozi. Pombe husababisha upungufu wa maji mwilini (dehydration), ambayo inaweza kufanya ngozi kuonekana kavu na yenye mikunjo.
Vinywaji vyenye sukari nyingi: Vinywaji kama soda na juisi zilizosindikwa zina kiasi kikubwa cha sukari ambayo inaweza kusababisha glycation. Huu ni mchakato ambao sukari inajishikiza kwenye protini kama collagen, na kuifanya collagen hiyo kuwa ngumu na isiyofanya kazi vizuri, na hivyo kuharibu muundo wa ngozi.
Kahawa: Ingawa kahawa ina faida zake kiafya, kafeini inaweza kuchangia kupoteza maji mwilini. Upungufu wa maji mwilini unaweza kufanya ngozi ionekane kavu na iliyokosa mng’ao. Hata hivyo, athari hii inaweza kupunguzwa kwa kunywa maji ya kutosha.
Vinywaji vya nishati (energy drinks): Vinywaji hivi vina kiasi kikubwa cha sukari na kafeini, ambavyo vinaweza kusababisha kuzeeka kwa ngozi kwa njia zinazofanana na soda na kahawa.
Chai yenye sukari nyingi: Kama ilivyo kwa vinywaji vingine vyenye sukari nyingi, chai yenye sukari nyingi inaweza kuchangia glycation na kuharibu ngozi.
Ikiwa umepata athari kutokana na vinywaji hivi, unashauriwa kutumia vinywaji vifuatavyo ili kurejesha ngozi yako kuwa ya kuvutia;
Maji: Kunywa maji ya kutosha ni muhimu sana kwa afya ya ngozi. Maji husaidia kuweka ngozi kuwa na unyevunyevu, kuondoa sumu mwilini, na kuboresha mzunguko wa damu.
Chai ya kijani: Chai ya kijani ina antioxidants nyingi, hususan catechins, ambazo zinaweza kusaidia kulinda ngozi dhidi ya uharibifu wa jua na kuongeza elasticity ya ngozi.
Juis ya machungwa: Juisi ya machungwa ni chanzo kizuri cha vitamini C, ambayo ni muhimu kwa utengenezaji wa collagen. Collagen ni protini muhimu kwa ajili ya kudumisha uimara na uthabiti wa ngozi.
Maji ya nazi: Maji ya nazi yana potassium na electrolytes zinazosaidia kuweka ngozi ikiwa na unyevunyevu. Pia, ina antioxidants zinazosaidia kulinda ngozi dhidi ya uharibifu.
Juis ya karoti: Juisi ya karoti ina beta-carotene, ambayo hubadilishwa kuwa vitamini A mwilini. Vitamini A ni muhimu kwa ajili ya afya ya ngozi na inaweza kusaidia kupunguza mikunjo na kuweka ngozi kuwa laini.
