Vinywaji vingi tunavyokunywa kila siku vinaweza kuwa na madhara makubwa kwa afya ya moyo wetu. Ingawa baadhi ya vinywaji huonekana kuwa na faida ya haraka, hasa kwa upande wa kuimarisha hali ya kiakili au kuongeza nguvu.
Daktari Evan Levine, ambaye ni daktari wa magonjwa ya moyo mwenye wafuasi wengi kwenye mitandao ya kijamii, ameorodhesha vinywaji vinne vilivyo na madhara makubwa kwa moyo, na pia ameonya dhidi ya matumizi ya vinywaji vya ziada vyenye sukari, kafeini, na viambato vingine hatari.
- Soda (Vinywaji vyenye Kaboni)
Chupa moja ya soda ina sukari nyingi kuliko tunavyoweza kudhani. Daktari Levine anasema kuwa soda ina kiwango cha juu cha sukari, ambacho kinaweza kuongeza hatari ya kupata magonjwa ya moyo kwa kuongeza mafuta mabaya (triglycerides) kwenye damu, kupandisha shinikizo la damu, na kuongeza hatari ya kupata kisukari.
Chupa ya soda ina vijiko 10 vya sukari, na matokeo yake ni madhara makubwa kwa moyo. Dkt. Levine anashauri kuepuka kabisa vinywaji vya aina hii, akisema kuwa vinywaji vya soda ni sumu kwa afya ya moyo.
- Frappuccino (Vinywaji vya Kahawa Baridi)
Frappuccino ni kinywaji kinachopendwa na wengi, lakini Dkt. Levine anasema kuwa vinywaji vya kahawa baridi vina madhara makubwa kwa moyo. Vinywaji vya aina hii vina sukari nyingi, na pia kafeini, ambayo inaweza kusababisha mapigo ya moyo yasiyo ya kawaida na kuongeza hatari ya mshtuko wa moyo.
Dkt. Levine anasema kuwa yeye mwenyewe alijikuta akifurahia kupata nguvu kutokana na frappuccino, lakini baadaye alijikuta akichoka na kupatwa na athari mbaya za kinywaji hicho.
- Pombe
Dkt. Levine anasema pombe inaweza kuwa salama ikiwa mtu hana matatizo ya moyo na ikiwa itatumiwa kwa kiasi kidogo, lakini unywaji wa pombe kwa wingi ni hatari kwa moyo. Pombe inaongeza shinikizo la damu, mafuta mabaya, na pia inahusishwa na matatizo ya moyo kama alcohol cardiomyopathy, hali inayosababishwa na unywaji wa pombe kwa muda mrefu na inaweza kuwa hatari kwa maisha.
Anasema pombe pia inahusishwa na matatizo mengine ya afya, na tafiti nyingi zinazozungumzia faida ya pombe kwa afya ya moyo hazina uthibitisho thabiti.
- Vinywaji vya Nishati (Energy Drinks)
Vinywaji vya nishati kama Red Bull na Monster vinajulikana kwa kuwa na viwango vya juu vya kafeini na sukari, jambo linaloweza kuongeza hatari ya matatizo ya moyo. Dkt. Levine anasema kuwa vinywaji hivi vina kafeini mara 1.5 ya ile iliyo kwenye kahawa, na pia vina sukari nyingi zaidi, ambayo ni tishio kwa moyo.
Kinywaji cha Monster kina sukari inayozidi vijiko 15, ambavyo ni hatari kwa afya ya moyo, hasa kwa watu wanaokunywa vinywaji hivi mara kwa mara.
Mbali na vinywaji vinne vibaya zaidi, Dkt. Levine anaongeza soda ya lishe (diet soda) kwenye orodha, akisema kuwa viambato kama xylitol na erythritol vimehusishwa na hatari ya mshtuko wa moyo na kiharusi. Maji ya limau (lemonade) na juisi ya machungwa pia zimeongezwa kwenye orodha, kwani mara nyingi zina sukari iliyoongezwa.
Pia, maziwa yenye mafuta zaidi ya asilimia moja na viungio vya kahawa kama Coffee Mate vimeelezwa kama hatari kwa afya ya moyo kutokana na corn syrup.
Vinywaji vinavyofaa kwa Moyo
Badala ya vinywaji vyenye sukari na viambato vyenye madhara, Dkt. Levine anashauri kunywa maji, maji, maji kama njia bora na ya gharama nafuu ya kutunza afya ya moyo. Pia, maziwa yatokanayo na mimea yasiyo na sukari iliyoongezwa ni chaguo bora kwa afya ya moyo.
Kunywa maji yasiyo na viambato vyovyote vya ziada, kama vile maji ya kaboni yasiyo na ladha yoyote, pia ni salama kwa afya ya moyo.
Kwa kumalizia, Dkt. Levine anasisitiza kwamba afya ya moyo inategemea maamuzi bora tunayofanya kila siku. Kuepuka vinywaji vyenye sukari, kafeini, na pombe kwa wingi kunaweza kusaidia kulinda moyo dhidi ya magonjwa ya moyo.
